Boðklivin

Ruddingardagur

8. flokkarnir ruddaðu við Láargarð fríggjadagin. Her síggjast røsku næmingarnir í 8. A við fonginum.

Próvtøka í munnligum donskum mánadagin 19/6.

Tit fara upp í ókendum teksti, og tit fáa 40 minuttir at lesa, greina og tulka í umframt at samanbera við annan tekst, tit hava lisið í skúlaárinum. Sjálv próvtøkan er umleið 15 minuttir. Tit hava tekstin, og tað tit hava skrivað í fyrieikingini, við inn í próvtøkuhølið. 

Skrá: Tit lesa eitt brot.

Tosa eitt sindur um høvundan! (Hava loyvi at leita á netinum)

Greina og tulka tekstin! ( Eg leggi tykkum frymlar, pappír og blýantar í fyrireikingarhølið)

Samanbera við annan kendan tekst.

 Góða eydnu!

Kunning um spurnarkanning

31. mars 2017

Góðu næmingar og foreldur

Saman við Barnabata fara vit at gera eina landsfevnandi spurnakanning millum allar 8. floksnæmingar í Føroyum. Kanningin er ein granskingarverkætlan, ið miðar eftir at fáa nýggj ítøkilig tøl uppá tilburðir, sum kunnu upplivast sum skelkandi. Tá vit menniskju eru úti fyri onkrum ræðandi ella skelkandi, er vanligt, at vit eru skelkað í eina tíð, áðrenn vit sissast aftur. Tó kann eisini vera, at vit koma út fyri onkrum, ið er truplari hjá okkum at sleppa av við, og sum ger okkum óttafull í longri tíð, ellar vit t.d. kunnu hava pínufullar endurminningar í dagligdegnum. Tað ber tó til at fáa hjálp fyri hetta, um tað hevur ov stóra ávirkan á gerandisdagin og vísindin roynir alla tíðina at fáa til vega nýggja vitan, soleiðis at vit bæði kunnu fyribyrjgja og hjálpa.

Mentamálaráðið hevur góðkent, at kanningin verður gjørd í føroyska fólkaskúlanum.

Spurnarblaðið tekur áleið ein skúlatíma at svara og spurt verður bæði inn til, um tit hava upplivað nakrar skelkandi hendingar og hvussu hesar møguliga hava ávirkað tykkum. Spurt verður eisini inn til, hvat tit gjørdu fyri at meistra hesar hendingar og tykkara royndir at koma víðari í lívinum.

Tit verða sjálvandi dulnevnd, so ongin veit hvat júst tit hava svarað. Tá samlaðu úrslitini verða løgd fram í vísindaligum høpi, verður tað eisini bert gjørt sum bólkur. Hvat tit svara, ella um tit velja at luttaka ella ikki, fer ikki at fáa ávirkan á tykkara skúlagongd. Við hesum brævi biðja vit tískil um samtykki til luttøku í kanningini. Allir næmingurin hava sjálvandi rætt til ikki at luttaka, og í fall verða tit biðin um at venda tykkum til skúlastjóran ella flokslæraran og siga, at tit ikki ynskja at luttaka í kanningini og so avtala tit, hvat tit skulu gera, meðan kanningin fer fram.

Vit eru sera takksom, um tit ynskja at luttaka og vóna, at tit svara so erligt sum tilber. Úrslitini frá hesi kanning verða bæði brúkt til at fremja størri vitan og vónandi fleiri hjálpartiltøk í Føroyum og úti í heimi.

Hava tit spurningar ella ivamál um kanningina, kunnu tit venda tykkum til Barnabata. Og tørvar tykkum hjálp ella vegleiðing um okkurt skelkandi tit hava upplivað, kunnu tit antin venda tykkum til Barnabata (http://www.barnabati.fo/skriva-braev-til-tu-eg-radgevingina/), tykkara heilsusystur, lækna, ella ein vaksnan, sum tit kenna tykkum trygg við.

 

Vinarliga

 

Barnabati

Djóni J Eidesgaard

djoni@barnabati.fo

Tlf 522011

 

Tóra Petersen

Landssjúkrahúsið, Phd, løggildur psykolog

tlf 220460

 

Kunning um enskt eftir páskir

Carli Eli er valdur í nevnd Føroya Lærarafelags. Hetta merkir, at hann verður upptikin av fakfelagsarbeiði hósdagar. Til summarfrítíðina fara Carl Eli og Lív tí at samstarva um at hava flokkin í enskum; Carl Eli týsdagar og Lív hósdagar.

ONGAR FARTELEFONIR Í SKÚLANUM Í DESEMBER

Góðu foreldur

Vit hava tey seinastu árini lagt merki til, at næmingar í framhaldsdeildini eru meira og meira knýttir at fartelefonum.

Fyri nøkrum árum síðani, vóru fartelefonir ein stórur, órógvandi trupulleiki í undirvísingini, men í dag síggja vit trupulleikan størri í fríkorterunum. Tað er á ein hátt syrgiligt at síggja so nógv ung fólk sosialisera seg burtur frá vinum og floksfeløgum. Tey sita saman í stórum bólkum uttan at vera saman, ístaðin sita tey og stara niður í eina fartelefon. Vit eru sannførd um, at fartelefonin er ein stórur stressfaktorur í teirra tilveru, tey skulu alla tíðina vera tøk at svara smsboðum og dáma alt møguligt á sosialu miðlunum.

Sum skúli hava vit eina uppgávu at læra hesi ungu fólk at virka í felagsskapinum. Vit fara tí at gera eina roynd at fáa tey at hugna sær, stuttleika og práta meira saman í fríløtunum. Vit vóna, at tit foreldur stuðla okkum. Sum vit skilja, so halda nógv foreldur eisini, at tey ungu brúka so nógva tíð á netinum.

Fyrsta stig á vegnum er, at vit fara at hava ein fartelefonfrían desembermánað, tað merkir, at vit onga fartelefon vilja síggja í skúlatíð. Vit mæla til, at fartelefonirnar liggja eftir heima. Verður hon brúkt í skúlatíð, t.e. bæði í tímunum og í fríkorterunum, verður hon tikin og løgd upp á skrivstovuna, har ið foreldur ella onnur avvarðandi kunnu koma eftir henni. Hon verður ikki útflýggjað næmingum.

Skúlin keypir nøkur spøl, so næmingar kunnu spæla í fríkorterunum.

Vónandi taka tit væl undir við hesum tiltakinum.

Nýggjur lærari í donskum

Tanja er farin í barsilsfarloyvi. Jacoba Lervig fer at undirvísa 8. a í donskum tað, sum eftir er av skúlaárinum.

FERÐSLAN VIÐ EYSTURSKÚLAN

Góðu foreldur

Nú, vit hava myrkastu tíð á árinum, eru ávísir ferðslutrupulleikar um morgnarnar, tá ið børnini koma í skúla. Hetta ger seg serliga galdandi ovast í Tórgarðsgøtu, har 1., 2. og 3. flokkur eru.

Trupulleikin ger seg serliga galdandi á morgni, tá ið foreldur koma við børnunum í skúla. Ovast í Tórgarðsgøtu er so trongt at venda, at tað er so skjótt, at proppur kemur í, tá ið bilar standa stillir bæði omaneftir og niðaneftir. Og tað er júst her, at børnini, sum eru til gongu í skúla, skulu yvir um vegin. Tey skulu yvirum vegin millum allar bilarnar, sum standa parkeraðir, og tískil kenna tey og foreldur teirra seg sera ótrygg.

Gott hevði verið, um vit øll royndu at hugsa um hetta framyvir.

Eitt gott hugskot fyri tey, sum koma gjøgnum Skúlagøtu, er at seta børnini av, á veg omaneftir Tórgarðsgøtu, beint omanfyri busssteðgistaðið. Børnini, sum verða koyrd í skúla, sleppa undan at fara yvir um vegin, tá ið tey skulu inn í lítlagarð, og børnini, sum eru til gongu, sleppa undan at fara millum allar bilarnar. Skulu tit fylgja børnunum inn, ber til at seta bilin frá sær og ganga við børnunum.

Vónandi vilja tit hjálpa okkum at økja um trygdina við skúlan.

Blíðar heilsanir

Eyðdis Eidesgaard, skúlastjóri.